الأربعاء، 17 أبريل 2019
فما حاجات يصيرو في حياتنا و مش احنا المسؤولين علاهم ... المشاكل هاذم تغطس فاهم و مش بإرادتك .. تنجم تحب عبد من غير ما تشعر و ينجم الانسان لي انتي حبيتو و حبك يكون عندو خرم في حياتو يشبه للخرم الي في حياتك .. يعني تكونو متشابهين من ناحية المشاكل لي عشتوها كيف ما متشابهين في حاجات اخرى .. اما ماكمش كيف كيف من ناحية الغزرة للمشاكل هاذي .. فيكم الي يحب يحارب و هذا من حقو و فيكم الي يحب يستسلم و ما عادش يحلم و هذا من حقو زادة يعني ينجم انسان منكم يختار يهرب و يوجع الطرف الآخر كيف ما بش يتوجع هوا .. و هاذي ما تتسماش انانية اما الانسان هذا عندو قناعة و مبدأ انو ما يحب حد يهزّ معاه الرزن و الهموم .. هنا تلقى زوز ضحايا .. مش هوما ختارو يحبو .. و مش هوما ختارو يبعدو فما حاجات تلز على البعد .. هنا يعيشو زوز مالناس يحبو بعضهم ،، و بعدو خاطر يحبو الخير لبعضهم .. في حين انو ممكن الخير يكون كي يبداو بجنب بعضهم .. كي يتعانقو ،. كي يتخبى واحد منهم في صدر لاخر .. الخ الخ الخ هنا ديما نقولو ان الوقت هو لي يلزنا على الحاجات و هاذم .. الوقت ظغط عليك ،، صحيح الوقت ظلمك ،، صحيح الوقت خلاك تدخل بعضك و ما تعرفش تختار ،، صحيح اما الوقت عمرو ما خذا قرار .. الوقت يستناك انتي لي تقرر .. العلاقات هاذي عادة ما توفى بوجيعة .. يحسوها زوز مالناس كيف كيف اما كل واحد يعيشها وحدو .. في الحالات هاذي صعيب تلقى عبد يلوم عبد آخر .. خاتر الحكاية مبنية على الحب .. يعني كيف ما واحد لزتو الظروف انو يبعد .. الآخر تلزو الظروف و الا عزة نفسو انو ما يرجعش .. اما مش كل ما توفى الحكاية يوفى الحب .. الحب ما يوفاش .. الحب يخليك تغفر قبل ما تسمع اعتذار الانسان لي قدامك .. الحب يخليك تبعد بش ترتح ناس و تقرب بش ترتح ناس .. انك تحب مش معناها تكون بجنب لي تحبو انك تحب يعني انو حتى خيال الانسان لي مشا يقعد عايش وسطك .. تفكرو انو الحب ما يوفاش خاطر ذكرى صغيرة من تعنيقة تخليك حي و تنبض
الاشتراك في:
تعليقات الرسالة (Atom)
ليست هناك تعليقات:
إرسال تعليق