الثلاثاء، 20 أكتوبر 2020
اجمل حاجه قرأتها النهاردة♥️في حد بيبقي قاعد معاك كل ليلة في اوضتك بيراقبك وبيراقب تصرفاتك ، بيبقي في قمة سعادته وهو شايفك وانت مش شايفه ، بيحوم حوليك وبيبقي عارف كويس انت بتعمل ايه ، غالب...ا مبيبقاش لوحده ممكن يكونوا اكتر من واحد ، انا مش قاصد ارعبك انا بس عايزك تخلي بالك انك مش لوحدك زي مانت فاكر ..، الموضوع بدا لما عمي صديق جاله جهاز جديد اسمه من المانيا ghostark عمي ديما مهوس بالبحث عن الآثار ، وديما مقتنع إنه في يوم هيلاقي قطعة تغير كل حياته ، كان كل هدفه إنه يقنع والدي اننا نهد البيت لانه مؤمن تماما إن تحت بيتنا في مقبرة .. وكان والدي ديما يدخل صراعات معاه ! واسمع الحوار المتكرر بنهم -- ياصديق .. مفيش بيت هيتهد مش كفاية مضيع الورث ال اخدته من ابوك علي الغيبيات ؟ بدل متفتحلك مشروع تكسب منه أو تطلعلك اي مصلحة ، أو حتي ياأخي تشتري شقة ، فوق ياصديق الوقت بيسرقك .. كلام ابويا ديما كان تعنيفي لأخوه الأصغر ، عمي صديق أصغر اخواته جه علي بنات كتير وكان آخر العنقود ، وجدي دلعه بزيادة لدرجة أنه علي مدار 35 سنة ميعرفش يعني ايه شغل ، بس انا كنت قريب منه جدا ، وديما يقولي .. - انا مش عارف ابوك بيعمل كده ليه ؟ هو عجبه حال اخواته البنات كده ؟ .. مهو كلهم موافقين علي هد البيت وجبنا اكتر من خبير وقال إن البيت تحته اثار ومقبرة كاملة .. انا مش عارف لحد امتي هيفضل ابوك ممانع .. ابويا ديما مقتنع أن الحاجات دي فيها خطورة ، وان مش سهل تطلع اثار وتبقي مليونير لازم تضحيات كتير ، وعشان تضحي لازم تلبي اوامرهم ؟ .. أوامر مين رفض يقولي وغير الموضوع .. بس بعد بحث عرفت أن ال بيقوله ابويا حقيقي ، وان الباب ال بيجيلك منه الريح سده.. بس عمي مكنش مقتنع بده نهائي ، فضل الحلم بيطارده لسنين .. لحد ماابويا اتوفي ، اخر كلمة قالها ليا -- اوعي في يوم تضعف وتاخد طريق الشيطان ! .. كنت عارف قصده ايه كويس ، وعشان كده رفضت كتير طلبات عمي ، ومحولتش حتي ان ياخدني عقلي ولو لحظة للاستجابة ، لحد مالقيت عمي بيخبط علي بيتنا في يوم وهو بعد حوار طويل طلع جهاز غريب شبه ال ايفون ومذود كمان بسمعتين ومكان لتسجيل الاصوات من جيبه وقالي .. -- ده اسمه ghostark الجهاز ده بيعرفك الموجات ال فوق صوتية ال متقدرش تسمعها وكمان في كاميرا أمامية بتقدر تشوف ايه ال كان موجود .. - ايوه اسمع ايه بردو واشوف ايه ؟؟ .. عايز توصل لايه ياعمي ماتجيب من الاخر .. -- انا عايز اهد البيت ياحسن ، وواقفة عليك انت الموضوع بسيط انا ال هتكفل بكل حاجة ولو مفيش حاجة في البيت همضي وصل أمانة بمليون جنيه وده نصيبك في البيت .. وصدقني لو خرجت ال في البيت هتاخد نصيب ابوك كامل ! .. انت اكيد مش عجباك العيشة دي في شقة 150 متر انت وكل اهلك !! .. فضل يتكلم ويلعب في دماغي لحد ماوفقت .. وفقت من ثقته والارقام ال كبيرة ال كان بيقولها ! والاهم من ده كله اني حسيت أن مش هخالف راي ابويا اوي لاني مش هشارك في أي حاجة .. ومعايا وصل ب مليون جنية لو ملقاش حاجة كتعويض ! .. عمي حدد يوم بالعملية بتاعته وقرار الهدم .. كنت مستني اليوم ده بفارغ الصبر .. واتلقيت مكالمة منه أنه دخل البيت وهو وال معاه ! .. فضلت مستني كاني طالب مستني شهادته ، بس فات يوم والتاني والتالت ومفيش حس ولا خبر ! .. مبيردش علي تليفوناته .. لا ده قفله نهائي بعد يومين ! ، روحتله بيته ، عشان يفتح ابن عمي الصغير علاء ، سألته عن والده رد أنه ميعرفش عنه حاجة بقاله اربع ايام ! .. شكي ذاد أن عمي طلع كل حاجة وهرب ! .. بس قبل ممشي جتلي رسالة أن تليفونه اتفتح ! .. لقيت نفسي بتصل بي وفعلا رد عليا -- انت مبتردش عليا ليه ؟ هو ده اتفاقنا ياعمي ؟؟ - تعالي البيت ياحسن انا طلعت كل حاجة ومستنيك .. --واجي البيت ليه .. متجيلي ؟ - مينفعش .. الكمية كبيرة اوي وعايز نشوف هنقدر نتصرف فيها ازاي .. كنت متردد ولكني فرحان ، وعشان كده اخدت تاكسي ورحت بيت العيلة .. كان زي مهو ! .. متهداش ؟.. فتحت الباب .. الدنيا كانت ضلمة تماما .. فضلت انادي -- عمي صديق انت فين ؟؟ .. مكنش حد بيرد عليا بس سمعت صوت تكسير من المطبخ ال قديم .. وفعلا ، كان محفور في نفق لتحت ومن الواضح أنه مكسرش البيت بس حفر النفق في المطبخ لتحت .. وفي سلم انزل عليه ، نزلت والدنيا كانت ضلمة نهائي عشان كده شغلت كشاف موبايلي -- عم صديق ؟ .. انت هنا ولا فين ! .. دي كانت الكلمة ال قولتها قبل مقع علي وشي .. سلطت كشافي عشان الاقي ، عمي ومجموعة من الرجال ال معاه صرعي !! كلهم ميتين وقاطعين النفس .. بقيت اصرخ ولكن مش حاسس بصوتي .. عمي كان جمبه الجهاز ال قال عليه وماسكه في ايده ، .. اخدته منه وانا بجري تاني علي السلم !! .. انا متاكد ان كان في حد بيجري ورايا .. متاكد ان في حد مسك رجلي وانا بطلع السلم !! .. خرجت وانا بصرخ !! ..وقفلت الباب ، ومش عارف هعمل ايه في المصيبة دي ، وطلما هو ميت مين ال اتصل بيا ! .. ابلغ الشرطة؟ .. مفيش حل تاني ، بصيت في ايدي عشان الاقي الجهاز الغريب ده .. مكنش في حل غير اني ابلغ الشرطة .. .. وبعد يومين كاملين من التحقيق حكتلهم كل ال حصل معادة سيرة الجهاز ال معايا ، روحت البيت وانا جسمي مكسر ، ومش عارف هما ايه ال حصل ليهم ؟ وهل اتقفل المحضر فعلا علي اختناق !؟ .. لقيت نفسي بتذكر كلام عمي .. -ده اسمه ghostark الجهاز ده بيعرفك الموجات ال فوق صوتية ال متقدرش تسمعها وكمان في كاميرا أمامية بتقدر تشوف ايه ال كان موجود .. فضلت أتأمل الجهاز .. وأسأل نفسي ياتري فعلا كلامه حقيقي ؟ .. فتحت الجهاز بس مكنتش سامع اي حاجة ، دخلت علي النت عشان اشوف الشرح وازاي بيشتغل ؟ .. عرفت خطوات كتير ! .. ووصلته باللاب توب ! .. لقيت شريط تسجيلي مذود بمشاهد !! .. خليني اوصفلك ال شوفته وال سمعته "" عمي معاه مجموعة من الناس ، تقريبا معاهم دجال كمان باين من لبسه ! .. ، الدجال بيقول لعمي -- المكان ده مش كويس ياصديق !! .. وعليه حراسة كتير انا مش مطمن ؟ عمي بيشخط في !! .. وهو بيقول -- مش مطمن ؟؟ .. انت تعرف اني بقالي 20 سنة عشان اكون هنا !! .. دلوقتي بتقولي مش مطمن ؟ .. انا هدخل ال مقبرة يعني هدخل ! .. ثواني .. في خيالات كتير بتظهر حوليهم هما مش شايفنها !! .. بيقفوا وراهم ؟ ..لا وبيصدروا اصوات غريبة !! .. شكلهم مش واضح .. بس بيصطفوا وراهم كان مفيش مجال للرجوع .. الجهاز ال في ايد عمي بيصفر ! .. عمي بيتوتر وبيقول .. -- طلما الجهاز بيصفر كده يبقي هما هنا .. قول العزيمة بتاعتك واخلص ..!! .. الشاشة بتشوش وبتقطع ... بترجع تاني بس علي صوت صراخ عمي والناس ال معاه !! .. اخر حاجه بشوفها هو عمي علي الأرض .. والجهاز بيتاخد من أيده .. في خيالات مسكاه .. وبتبص للكاميرا دلوقتي ؟ .. الجهاز فصل !! والفيديو خلص .. """ حسيت برعشة مسكتني لمجرد أن الفيديو خلص ! .. مسكت الجهاز وانا بتامله .. دوست علي زرار التسجيل ! .. وفضلت أوجهه في كل ركن في اوضتي ؟ .. كان بيصفر !! .. بيصفر بشكل مزعج .. قفلته .. وحطيت الوصله تاني .. وبدأت اشوف فيديو جديد .. كان فيديو مرعب !! .. في خيال لشخص ما في اوضتي ؟ .. كان قاعد جمبي !! .. صوت ضحكه باين .. بيتكلم باللهجة غريبة ! .. انا بتشمي في الاوضة وهو بيمشي معايا مصمم يجي في كل ركن بصوره وكأنه قاصد يوصلي رسالة أنه معايا وبعدين ظهر خيال تاني .. ! قفلت الفيديو وانا عايز اكسر الجهاز .. بس خليني اقولك نصحية .. في حد بيبقي قاعد معاك كل ليلة في اوضتك بيراقبك وبيراقب تصرفاتك ، بيبقي في قمة سعادته وهو شايفك وانت مش شايفه ، بيحوم حوليك وبيبقي عارف كويس انت بتعمل ايه ، غالبا مبيبقاش لوحده ممكن يكونوا اكتر من واحد ، انا مش قاصد ارعبك انا بس عايزك تخلي بالك انك مش لوحدك زي مانت فاكر .. ----------------------- قصة جديدة اتمني تعجبكوا ولو عجبتك متنساش الايك والشير عشان دعمك بيخليني اكمل ❤️❤️
الاشتراك في:
تعليقات الرسالة (Atom)
ليست هناك تعليقات:
إرسال تعليق